නම්බර් එකට නමක්!!! Please...

හිරුවගේ මඤ්ඤං පෝස්ට්කටුවේ සෙන්නා දාලා තිබ්බ කොමෙන්කටුව හින්දා මට ඇත්තටම කල්පනා උනා විකාර වැඩ කීපයක්ම.

//අර ෆෝන් එකේ නම සේව් කරද්දි, my love වලින් පටන් ගන්න අය තමාලු අන්තිමට මල හෝන්තුව කියලා දාගන්නෙත්.. මමනම් එදත් නම විතරයි, අදත් නම විතරයි..//

ඇත්ත තමා සෙන්නා කිව්ව වගේ කෙල්ල යාළු වෙච්ච වෙලාවේ ඉදල බැදල ලොකු දරුවෝ හදාගන්න කාල පරාසය ඇතුලත හුගක් දෙවල් වෙනස් වෙනවා. ඇයි පෝන් එකත් වෙනස් වෙනවා. එතකොට පස්සෙ දාන නමත් සෙන්නා කිව්ව වගේ වෙනස් වෙන්න ඉඩකඩ තියෙනවා.. එතකොට නම වෙනස් කරන්න එකම හේතුව තමා පෝන් එක නේද....

මගේ මිත්තරයෙක් හිටියා ඌ යාළු වෙන්න ට්‍රයි කරේ ජේවීපි කාලේ අපේ ගමේ හිටිය හොදම ජේවීපි කාරයගේ දූව. ඔය හාදයට අපි කියන්නේ බකට් කියලා. ඒ කියන්නේ හැම තැනම ගිහිල්ල.. අනිවා කෑ ගහනවා ආසාධාරණයි අසාධාරණයි කියලා. ඒත් ඇත්තට කිව්වොත් ඉතිං හැම තැනම අසාධාරණයක් අඩුවෙන් හරි තියෙනවයි කියන එක මිනිහා තේරුං නොගන්න එක කොයි තරං අසාධාරණද? මේ හාදයා ගිය ගිය තැන බකට් දාන හින්දා මිනිහා නිකම්ම ලාල් නෙමෙයි බකට් ලාල් උනා.

හරි දැං අපේ හාදයා බකට් ලාල්ගේ දූට ට්‍රයි කොරල කොහොම හරි කෑල්ල දාගත්තා. මුගේ ගෙදරට ආරංචි වෙලා, මේ ගෙරියා බකට් ලාල්ගේ දූගේ පස්සෙන් යනවයි කියල, ගෙදරින් මේකට හෙන බකට්. දැං මක්ක කරන්නද යාළු වෙලා ඉවරයි නෙව. මිනිහගේ අයියල දෙන්න හෙන සෝදිසියෙන් ඉන්නේ.. නිතරම පෝන් එක බලනව මොකක් හරි ක්ලු එකක් හොයාගන්න.. දවසක් මම මුගේ ගෙදර යන කොට ඒකගේ ලොකු අයියා ඉස්සරහ පුටුවක වාඩිවෙලා ඉන්නවා. මිත්තරයා නෑ.. මම ඇහුවම ඌ කක්කුස්සියෙයි කියල අයියා කිව්වා. ලොකු අයියා මගේන් අහනවා.

“මල්ලි උඹ මොකද මේ මහ රෑටත් අපේ මල්ලිට කතා කරන්නේ. බොලා පාඩං කොරන්නේ පෝන් එකෙන්ද?“

#$%^&%* මට හෙන මංඤ්ඤං

“නෑ අයියේ මම රෑට කතා කරන්නේ නෑ. ඔය මිස් කෝල් එකක් දෙකක් දෙනවා එච්චරයි..“

“වෙන්න බෑනේ කියහං බලන්න නොම්මරේ“

“0776688463“

“හරි හරි මං හිතුවා හරි.. මූ එහෙනං මල්ලිගේ නම දාගෙන තමා අර බඩුවගේ නම්මරේ සේව් කරල තියෙන්නේ.. නියම අපතයා..“

අජෝව් අහුඋනානේ.. අයියෝ මූ කෑවා හොදින්ම ඒ පාරනං. කලින් කියන්න එපායැ, මම එහෙනං බේරගන්නව නේ මේ පොල් බූරුවව. මොකක්ද ඉතිං දේශකයා කියල නම දාගෙන කෙල්ලගේ නම්මරේ සේව් කොරල මූ මල් කඩල අයියට අහු උනා. එහෙම නොවුනනං ඒ කියන්නේ ඔය නොම්මරේ මගේම උනා නං හෙම. හෙන තොප්පියයි. කොල්ලෝ දෙන්නෙක් සෑට සෑට මල් කඩනවයි කියල ඔප්පු උනානං අම්මප‍, මමත් නිකං ගේ කුරුල්ලෙක් කියල මාට්ටු වෙන්නත් තිබුනා. හෙහ්..

අනිත් එක තමා.. මගේ තව යාළුවෙක් හිටියා මිනිහා ඉතිං එක පාර දෙක තුන කරන එකා. එතකොට අවුරුද්දකට මූ සාමාන්‍යෙයන් 10 ක් 15 ක් වත් කරනවා. ඉතිං මූට නං මතක තියෙන එකක්යැ. කොල්ලා හෙන හැන්ඩ්සම් කියන්නේ ආයේ දෙකක් නෑ කතාවත් ඒ වගේමයි. කෙල්ලෝ ඇදීලා යන්නේ. අපිටත් ඉරිසියයි මූ ගැන අම්බානට. කොහොම හරි එක දවසක් මූට කෝල් එකක් එනකොට මිනිහා පෝන් එක දාලා කොතන හරි ගිහිල්ල හිටියේ.  මම පෝන් එක අරගෙන නම දැක්කම තමා උඩ ගියේ.  “දේශා නංගි පර්ල්“. මට මල.. මූ වගේ පෙරේතයෙක්. අපේ නංගිවත් අල්ලගත්තද දන්නෑ කියල මම චුත වෙන්නම මේකට හිතෙන් බැන බැන ඉන්නවා. මූ ආවා.

“අඩෝ.. තෝ මොකද අපේ නංගිගේ නම දාගෙන ඉන්නේ. එක කෑල්ලකට“ (ඇයි නොම්මරේ නංගිගේ නෙමෙයි කියල මම දන්නවනේ.. හු....)

“හරි හරි ඕයි ඒ කියන්නේ තොපේ නංගිගේ යාළුවෙක් තමා.. ඇයි යකෝ මතක නැද්ද දැනට මට පර්ල් ලා කී දෙනෙක් ඉන්නවද කියලා“

#$%^&*^*(^*%^#$%#@

ඒ වගේ තව හොද සීන් එකක් තියෙනවා යාළු වෙච්චි කෙල්ලගේ නම්බර් එක “සාරුක් කාන්“ කියල දාගෙන හිටිය එකක්. අපේ අර බකට් යාළුව නං කෙල්ලට පස්සේ දාගෙන හිටියේ “සුදූ“ කියල ඒකි කළු උනාට. බැන්දට පස්සේ දාගෙන හිටිය නම “නංගි“. දැං ළමයි දෙන්නෙක් ඉන්න හින්ද මොකක්ද කියල දන්නේ නෑ.. සමහර විට “අම්මි“ වෙන්නත් පුළුවන්. හැක්...

මම නං ඕං ලව් කොරපු කාලේ ගෙදරට හොරෙන් කතා කරා නං අනිවා මතකෙන් නම්මරේ ගැහුවා, කතා කළා, හිස්ට්‍රිය මැකුවා. දැන්නං දේශිකා කියල නම දාගෙන තමා ඉන්නේ. අනාගතේ මොකක් වෙයිද දන්නෑ අනේ.. ස්මාර්ට් පෝන් කියල එකකුත් තියෙනවනේ...