ඕං ආතල්!!!

වැලංටයිං අයිං කර ගන්න බැරි විදියට අපේ සමාජය වෙළදාමට වාල් වෙච්චි යුගයක් ඇති කරේ කව්ද කියන පුරස්නය වැදගත් එකක් ද කියල මට අහන්න වෙන්නේ මේ වෙන පයිත්තියං වැඩ දිහා බැලුවම. 

ලව් රේස්, ලව් පාටි, ලව් ට්රේන්, ලව් ප්ලේන්, ලව් ඉලව් එකසිය ගානට එක එක ව්‍යාපාරික නාමත් එක්ක හැම පිස්සු චැනල් එකකම තොර තෝංචියක් නැතිව කියවෙන කොට අනේ මන්ද? මේක මොන තරං ගෙරි සමාජයක්ද කියල හිතෙනවා.. 

ඒ වගේම තමා අද සෑට වැලංටයිං ලා, තමන්ගේ පෙම්වතියගේ උපරිම සතුට ලබා ගන්න දාස් ගණන් වියදං කරගෙන නයිට් ක්ලබ් ගානේ ගිහිල්ල එළි වෙන කං බීල උදේ පාන්දර ටැක්සියක් අරන් ගෙදර ගිහිල්ල බුදියගන්න සිද්ධ වෙන දවස. 

ඒ වගේම හෙට උදේ ඉදලා, ඔය හැම දුරකතන සමාගමකට ම කෝටි ගණන් වටින එස් එම් එස්, දුරකතන ඇමතුම්, එම් එම් එම්, තව ඒවා තියෙනවා මම නොදනී, ලැබෙන දවස තව ටික වෙලාවකින් පටන් ගන්නවා. ඉතිං ඒ ගොල්ල ඒවට සුදානං වෙන්නත් එපායැ. අනික ඔය කොළඹ එහෙම තියෙන තරු හෝටල්, නයිට් කල්බ්, කැරිකේ, එහෙම හොදට සරසලා ලස්සන කොරලා සුදානං වෙලා ඉන්නවා හොදායි මළ මගුලක් වත් නොදන්න ලංකාවේ ගොබ්බ වැලංටයිංල පදුරු පිටින් එන්න ලෑස්තියි. එහෙනං හරිනේ... වැලංටයිං අද සෑ සිට වැල ඇදපුවාවේ. මම ආපු කාරණාව කියන්න එපායැ.

සාමාන්‍යෙයෙන් මම නිවාඩු පාඩු වෙලාවක් උනාම, ඒ කියන්නේ හිරගත කරන්න පෙර, අනිවාර්යෙන් යනවා මගේ හොදම මිත්තරයෙක් ඉන්න ඈත ගම්බද පළාතකට. එහේදි හම්බ වෙන සෞම්‍ය කාලගුණයයි, අළුත්ම හාලේ බතයි වැංජන ටිකයි මතක් වෙන කොටත් මට කටට කෙල උනන හන්දා, ඉස්පාසුවක් ලැබුනොත් අනිවා එහෙ යනවා.. 

බස් එකේ ගමනත් ටිකක් දුස්කරයි.. උන්දැගේ ගෙදරට යන්න තියෙන අන්තිම කිලෝමීටර් 7 යන්න නං බස් නෑ.. ඉතිං මොකක් හරි ට්‍රක් එකක, අත් ට්‍රැක්ටරයක නැගල තමා යන්න ඕන.. සමහර දවසට වාහන හතර පහක විතර යන්න වෙන වෙලා හිටන් තියෙනවා.. ඒත් කනගාටුයි පයිම්ම ගියපු දවස් හිටං තියෙනවා. පුදුම ලස්සනයි.. කදු, වංගු, තේ වතු, පහු කර ගෙන යන ඒ ගමන හරිම ආස්වාද ජනකයි.. මම අනිවාර්යෙන් පළවෙනි කිලෝමීටර් එක පයින් යනවා.. ඒක රහසක්.. 

හා කියන්නං... බස් එකෙන් බැස්සම දුර ඉදන් ආපු මට ඉතිං චූ බර වෙනව නෙව. ඕකට කියාපු තැනක් තියෙනවා මං හොයාගත්ත, ඒක, මේ ටිකක් දුර පයින් ගියාම තියෙන ගරා වැටුන බිල්ඩිමක් පස්සෙන් තියෙන්නේ. 89 කාලේ භීෂනේ හින්දා ගිනි තියපු රජයේ ගොවිජන සේවා බිල්ඩිමක්, හැබැයි ඉතුරු වෙලා තියෙන්නේ කළු ගැහිච්චි භීෂනේටවත් බිලි ගන්න බැරි උන බිත්ති ටික විතරයි. අඩි ගානක් උසට මානා වැවිලා. ඔක්කෝම බිත්ති කළු පාටයි. ඒත් සමහර තැං වල සෙවල වැදිල කොලපාට ඉරි තියෙනවා උඩ ඉදලම.. 

මේ මානා අතරින් තියෙනවා පොඩි ඉඩක්. ඒක ගමේ මිනිස්සු මේ බිල්ඩිම අතරින් යන්න හදාගත්ත අඩි පාර. මේ වදෙන් බේරෙන්න බැරිව වෙන්න ඇති මානා පදුරු ටික ඒ ඉඩ ලබා දිල ඇද වෙලා වැවෙන්නේ.. ඔය පදුරු අතරින් බිල්ඩිමේ පස්ස පැත්තට ගියාම තියෙනවා හෙමීට ගලා බහින ප්‍රසිද්ධ දොළක්. තනි කර පිරිසිදුයි.. නිකං එළ කිරි වගේ වතුර.. ඇත්ත බං.. නිරතම තියෙන්නේ පෙන ගහන වතුර පාරක්. 

ටිකක් වැස්ස තිබ්බ කාලෙක නං ඒ වතුර පාර ගල් වල වැදෙමින් යන කොට හොද රා කට්ටක් කටට ලං කරාම චිරිස් ගාලා විදින විදියට වතුර බිංදු විදිනවා ඇගට. ඒ සනීපෙත් තියාගෙන ඇළ අයිනේ ගහක් මුල්ලට පෝෂන පාරක් සපයන එක මාර ආතල්.. කොහොම හරි ගහට සංග්‍රහය දීල එනකොට මගේ මූන පුරාම හීතල වතුර බිංදු තියෙනවා.. ඒ මදිවට අත්වල ඉදන්.. ඊට පස්සේ හෙමීන් ආපු විදියටම පාරට ඇවිල්ල තමා ඔය මොකක් හරි එකක එල්ලිල ආයේ යන්න පටන් ගන්නේ.. 

මිත්තරයගේ ගෙදර ඉන්නේ අම්මයි තාත්තයි විතරයි.. හරිම පිළිවෙලකට තියාගත්ත පොඩි ගෙයක්. කුණු බිංදුවක් ඉඩමේ වත් නෑ.. ඉඩම තියෙන හැටියට තේ දාලා, එක එක ජාති එළවලු  වර්ග, එහෙමත් පාත්ති කරල තියෙනවා. ඒ අතර මගේ හිත ගියේම, එක සීරුවට තනි කෙලින් හතර වටේටම අතු දාගෙන වැවෙන කරාබුනැටි ගස් වල එතිල, පල බරව තියෙන ගම්මිරිස් වැල් ටිකට තමා.. ඒ ගම්මිරිස් පලදාව දැක්කම ඇති වෙන සන්තෝසෙ නං කියල වැඩක් නෑ.. 

ගේ පිටිපස්සෙන් මගේ හිතවත් දොළ ගලා යනවා. ඒ දොළ ඊට ටිකක් විතර එහායින් පස්සේ කැලේ ඇතුලට පිවිසිලා, ඒ පළාතම ජනශුන්‍ය කරල තියෙන්නේ. ඒත් කැලේ මැද්දට වෙන්නත් ගෙවල් දෙක තුනක් තියෙන විත්තිය නං මම දැං දන්නවා.. ඔය කැලෑවේ එක තැනක තියෙනවා හරිම ලස්සන තැනක්. එතන හරියට තනනිල්ලක් වගේ. ඊට එහායින් තමා කැලෑව තියෙන්නේ.. තන නිල්ල ඒ තරං ලොකු එකක් නොවුනත් පොලවේ තියෙන බෑවුම් එක්ක බැලුවම හරි විසාලට පේනවා. ඒ මතින් ඇවිද ගෙන යාම හරියට සිනිදු වෙල්වට් එකක් උඩින් ඇවිදිනව වගේ. (අපි පතනක් කියල කියන්නේ ඒ වගේ එහෙකටද මන්ද මට දැං මතක නෑ)

මම මිත්තරයත් එක්ක නොසෑහෙන්න ඔය පැත්තේ කරක් ගහන්නේ ඔය මොනා හරි ගෙඩි ජාති දෙක තුනක් කඩා ගෙන එන්න තමා ඉතිං. මිනිහ නැත්නං මම හරි තනියෙන් ඔය ඉසව්වේ කරක් ගහනවා. අඩු ගානේ ගහක් කොලක් හරි අත ගාල එන්න පුළුවන් හින්දා. ඊටත් වඩා ආසාව ඔය කැලෑවේ ඇවිදින්න. ඒක හරිම කූල් අනේ.. ගහක අත්තක් ඇගේ වැදුනත්.. ස්ස්.. සීතලයි.. හැබැයි මේ නුවර එළිය නං නෙමේ හොදේ.

එක දවසක් මම ඔය තන නිල්ල පහුකරන් කැලේට ඇතුල් වෙලා ගස් වැල් අතු පතර එහා මෙහා කරගෙන, දොළ පාර ඇදෙන දිහාට ගෑටුවේ ඔය අසිරියත් විදගන්න ඕන හින්දා. ඒත් මම ඇත්තටම දැන ගෙන හිටියේ නෑ මේ තරං ලස්සන දෙයක් ඇහැට දාගන්න හැකි වේවි කියලා.. ඔය කතා රස කරල කිව්වම අපේ සගයෝ වැල දාන්න එපා කියන හින්දා ඔන්න වැල අයින් කරල කයි පදයක් බැන්දා.. බලලම තේරුම් ගන්නකෝ.. ඔන්න මගේ වැලංටයිං පණිවිඩේ..

මල් මල් සළු පටෙන් හැඩ උනු මල්	එතනා
සන්සුන් ලෙසින් ආවයි මේ දොල	ළගටා
පිරිපුන් දේහයේ ගිනි සැර විදිනු	දැනා
නෙත් සිත් යොමු සිටියෙමි මම ඇය	දෙසටා
ඉර මද එළිය ගෙනෙනා මේ	කැලෑවේ
මින් පෙර නොදුටු මල් පිපිලා	තලාවේ
හිත ගිනි අරන් සිහි නැති උන	වෙලාවේ
මා දෙස බලන් මතුවී ජල	තලාවේ