කෝ මට සම්මාන ඩෝ!!

බලන්ටකෝ.. මට සම්මානයක් දීල නෑනේ.. මං කොච්චර හොදට ලියනවද අනේ.. ඒත් මට සම්මානයක් නෑ. ලබන පාරවත් එකක් ගන්න මක්ක හරි ජරාවක්වත් දෙන්න ඕන. ඕ යෑස්.. ඇයි යකෝ අර වයිපරේට කියල කවි ලියවගන්න තඩි දමියටත් එකක් දීලා. අනේ ඒකා දන්න කවි.. අරක්කු ලේගරයක් විතර කටේ හලාගන්න දන්න මිනිහට මොන කවිද?

අනිත් සම්මාන දිනපු අය ගැනත් මට කියන්න පුලුවන්. ඒත් වැඩක් නෑ..මොකද මං වගේ ලියන්න පුළුවන් එකෙක්වත් එතන නෑ.. හැක්..

හරි. අපි ඒවා පැත්තකින් තියමුකෝ. ඔය සම්මාන දුන්නය කියන්නේ ලංකා නිව්ස් වෙබ් කියල බොරු කියන වෙබ් සයිට් එකකින් නේද? ඒකෙත් නෙලුම් යායද මොකක්ද එකක්ලු. අනේ මන්ද බොරු කාරයොන්ට මයි බොරු කාරයෝ එකතු වෙන්නේ. මං කිව්වේ අපේ මාතා ගැන නෙමෙයි. ඒකා පහු ගිය ටිකේම මහින්දට චන්දේ දෙන්න ඔන්න මෙන්න ඉදල අද බුකියේ දාලා මෛත්‍රි 55% කින් දිනනවා කියල. ඒ කියන්නේ මෙච්චර කල් බොරු කරපු මාතා හෙට චන්දේ දෙන්නේ මෛත්‍රිට.. මං හිතන්නේ මිනිහා මලක් ගහන්නම ඇති.. ඒක බුදු ෂුවර්.. හැක්

ආ.හ්. මං කතා කරේ බොරු කියන ලංකා නිව්ස් වෙබ් එක ගැන නේ.. මට ඊට වඩා කේස් එකක් තියෙනවා. මම දන්නවා ලංකා නිව්ස් වෙබ් කියන්නේ ඔය අහිංසක විදියට අටෝගෙන යන සයිට් එකක් කියලා. ඒකට කමක් නෑ කියමුකෝ. ඒත් මේ බ්ලොග් වල පෙනී ඉන්න එක පුද්ගලයෙක් (මම නම කියන්න කැමති නෑ) තමා නිව්ස් වෙබ් එකේ සංස්කාරකවරයා නොමග යවලා බ්ලොග් පෝස්ට් තොගයක්ම නිව්ස් වෙබ් නෙලුම් යායට යවල තියෙන්නේ. පහු ගිය ටිකේම ලියන්න නොදන්න බ්ලොග් කාරයෝ කට්ටියකගේම බ්ලොග් පෝස්ට්කටු ඔය කියන නෙලුම් යායට කැන්දං ගියේ අර බොරු කාරයාම තමා. එයා හිතන් ඉන්නේ නම් එයා ඔක්කෝම දන්නවා කියල වෙන්ටැති. මං පැහැදිලිව කියනවා එයාට වැඩිය මම දන්නවා කියල හරිය. තමන්ට වැඩක් පලක් නැත්නං දෙයියනේ කියල පොතක් පතක් කියවගෙන ඉන්නේ නැතිව ඇවිත්, අර බස්සිල වගේ කමකට නැති කොට කෙල්ලොන්ගේ බ්ලොග් පෝස්ට්කටු අමු අමුවෙම නිව්ස් වෙබ් එකට දැම්මෙත් ඔය හාදයම තමා.

එහෙම එක එකාගේ පෝස්ට්කටු දාලා විතරක් නිකං හිටියේ නෑ. ඊට පස්සේ තවත් කුමන්ත්‍රණයක් කරල තියෙන විත්තිය මං දැක්කේ රන්දිල් ඇන්ටි දාපු බුකි ස්ටේටස් එකකින්. ඒ කිව්වේ එයාගෙත් නිල් කට්රොල් මල් කියල දාපු පට්ට පජාත පෝස්ට්කටුවටත් සම්මානයක් දීලය ඒකට අපට සුභ පතන්නය කියල දාපු ස්ටේටස් එක. ඔන්න ඕකෙන් තමා මම දැනගත්තේ මේ බොරු කාරයෝ හොර සම්මාන උළෙලක් තියල අත යටින් ගාන අරගෙන තමන් කැමති කීප දෙනෙකුට සම්මාන දීලය කියලා. අනිත් අයට කෙසේ වෙතත් මාතාට මහ ලොකුම සම්මානේ දෙන්න තරම්ම ඒ අය සව්ත්තු වෙලා තිබුනා. ඒ කියන්නේ සමහර විට සුද්දෙක් අමතක වෙලා දාලා ගිය විස්කි එකක් වත් අපේ සුද්දා උස්සල අර පුග්ගලයට දෙන්න ඇති. අනිවා.

හෝව් හෝව්.. පොඩ්ඩක් විතර අප්සැට් උනා නේද?? හැක්..

ඒක නෙමෙයි අනේ මං කියන්න ගියේ. සිංහල බ්ලොග් ලෝකය ව්‍යාප්ත කරන්න කාලයක් තිස්සේ කිහිප අවස්ථාවකම අපට අවස්ථාව ලැබිල තිබුනා. හිස් අහසේ සදරුවා තමා ඒකෙන් හොදම ප්‍රතිපල අත්විදල, වැඩිම බ්ලොග් රචකයන් ප්‍රමාණයක් සිංහල බ්ලොග් ලෝකයට දායාද කරපු එකා. ඒ ලක්බිම පත්තරේ ගියපු අතිරේකයක් නිසා.. (ඒක මම බලල නැති නිසා. අතිරේකයක්ද කියල හරියට දන්නෑ) ඊට පස්සෙත් පොඩි පොඩි අවස්ථා ලැබුනා. මේ ළගදි ලේක්හවුසියෙන් පන්නපු අපේ නලින් දිල්රුක්ෂ මහත්තයත් ප්‍රබුද්ධි එක්ක එකතු වෙලා දිණමින පත්තරෙන් බ්ලොග් වලට ගැම්මක් අරන් දෙන්න ලොකු උත්සාහයක් කලා. ඒ කිව්වේ ජාතික තලයට මේවා ව්‍යාප්ත කරන්න. ඒත් අතරමගදි වැඩේ හබක් උනේ මං දීපු ගල් බෝතලේ ගිලල දේශකයා කියන එකා ලියපු ලියුං දෙකක්ම එකම අතිරේකයේ පල කරපු දවසෙයි කියලයි අනිත් උන් නං කියන්නේ. කොහොම උනත් ඒකත් සාර්ථක උත්සාහයක්.

අපට ලගදි ඉදල බොහොම අගේ ඇති ප්‍රතිචාර දක්වන්නෙක් හමු උනා. බලන කොට එයත් බ්ලොග් එකක් ලියනවා. අජිත් ධර්ම කියල තමා නම තිබුනේ. මුණුපොතේ නම් තියෙන්නේ අජිත් ධර්මකීර්ති කියලයි. අජිත් අංකුර ලියන්නෙක් වගේම බොහොම සම්බන්ධතා තියෙන කෙනකේ විදියට ලංකා නිව්ස් වෙබ් එකට ඔහු කියවන බ්ලොග් වලින් තෝරාගත් ලිපි නෙලුම් යායේ පලකිරීම සදහා මුලිකව මැදිහත් උනා. ඔහුගේ නිර්දේශය මත තමා බොහොමයක් බ්ලොග් ලිපි නෙලුම් යායේ පල කිරීමට නිව්ස් වෙබ් සංස්කාරකතුමා කටයුතු කලේ. මෙතැනදි කියන්න ඕන ලංකා නිව්ස් වෙබ් කියන්නෙ ජාතික තලයේ ඇති වෙබ් අඩවියක්. මේ හේතුව නිසා සිංහල බ්ලොග් ලෝකයට නැවතත් ජාතික තලය ආමන්ත්‍රණය කිරීමට අවකාශය සැලසුනා. මගේ ලිපියකුත් එක පාරක් නෙලුම් යායේ පල උන නිසා මම දැක්කා, ට්‍රැෆික් වලින් නිව්ස් වෙබ් කියන්නේ ජාතික තලයේ වෙබ් අඩවියක් කියන එක. ඒ ලිපිය දාලා බොහෝ කාලයක් උනත් තවමත් එතැනින් මගේ අඩවියට පය තබන අය බොහෝ ප්‍රමාණයක් දිනපතා ඉන්න බව කියන්නේ බෝම සන්තෝසයෙන්. 

ඔය විදියට නෙලුම් යායෙන් සිංහල බ්ලොග් ලෝකයට ලැබුණ සැලකිල්ල වැඩි දියුණු කරගනිමින් හොදම බ්ලොග්කරුවන් වෙනුවෙන් යම් සම්මාන පිදිමක් කරන්න ඔවුන් කටයුතු කර තිබෙන බව දැක්ක විට මට ඇති උනේ ලොකු සතුටක්. මොකද මෙතනදි මම දන්නා තරමින් කිසිම කෙනෙකු තමන්ගේ අඩවිය සම්මාන සදහා ඉදිරිපත් කලේ නැහැ. නෙලුම් යාය විසින් මයි අදාළ බ්ලොග් අඩවි පවා තෝරාගත්තේ. ඒක නිසා මේ සම්මාන ලැබීම ඇත්තටම වටින දෙයක්. ඉල්ලීමකින් තොරව ලැබෙන විශ්මයජනක සම්මානයක් කොයි තරම් වටිනවද කියල තේරුම් ගන්න ටික වෙලාවක් යයි මයේ හිතේ. හැක්

ඉදිරියටත් අපි අජිත්ගෙන් උදව් බලාපොරොත්තු වෙනවා. පුරවැසි මාධ්‍යකරනය තවත් ව්‍යාප්ත කිරීමට අජිත් ගෙන් මේ දින වල ලැබෙන සහායෝගය අති විශාලයි. ඒ වගේම ඉදිරියේදිත් සම්මාන ක්‍රියාවලියක් සිදු කිරීමට අදහස් කරෙගෙන සිටින වග අජිත්ගේ ප්‍රතිචාර දුටු විට මට හැගෙනවා. මේ හැම දෙයක් ගැනම ලොකු සතුටක් මට තියෙනවා බ්ලොග් ලියන්නෙක් විදියට. 

සිංහල බ්ලොග් කලාව ජාතික තලයට රැගෙන යාම සදහා කටයුතු කරන අපේ හිතවත් අජිත් ධර්ම සොයුරාට තැනින් තැන නොව මගේම තැනදි අප්‍රමාණ ලෙස ස්තුති කිරීමට මා මෙය අවස්ථාවක් කර ගන්නවා. ඒ වගේම නෙලුම් යාය සංස්කාරක මඩුල්ලටත්, ලංකා නිව්ස් වෙබ් අඩවියේ ප්‍රධාන සංස්කාරකතුමා ඇතුලු සියළු කාර්ය මණ්ඩලයටත්, සම්මාන ලබා දීමේදි මුල්‍ය අරමුදල් සැපයූ Nation Building Society PLC සමාගමටත් ඔවුන් ඉටු කළ කාර්ය භාරයන් වෙනුවෙන් අසීමිතව ස්තුතියි. ඒ වගේම ඉදිරියටත් සිංහල බ්ලොග් කලාව ඉදිරියට ගෙන යාම සදහා ඔබ සැමගේ සහාය ලැබේයයි මා විශ්වාස කරනවා. අජිත්.. ඔබට නැවතත් ස්තුතියි..